A alcaldesa de Lugo, Lara Méndez, e a concelleira Paula Alvarellos anunciaron este venres a aprobación da nova relación de postos de traballo (RPT) do Concello, tras quedar obsoleta a vixente desde o ano 2006.
Méndez destacou que a nova RPT vén “avalada” pola unanimidade de todos os sindicatos con presenza no Concello e será “un dos instrumentos principais” que permitirán “modernizar a súa administración, cunha ordenación racional dos seus efectivos de persoal en consonancia coas necesidades reais dos distintos servizos”.
A aprobación prodúcese dunha xunta extraordinaria do goberno bipartito da cidade de Lugo, que comparten socialistas e nacionalistas. Méndez apelou á necesidade desta relación laboral, posto que e os traballadores do Concello “están por baixo, desde o punto de vista salarial, doutras grandes cidades”.
“Procuramos unha mellora nas súas condicións laborais, fóra diso os funcionarios desta casa sempre primaron a súa función pública por encima dos seus intereses persoais”, insistiu. En suma, son máis de 560 funcionarios cos que conta o Concello de Lugo, facéndose unha valoración “individual” de cada caso, nesta nova Relación de Postos de Traballo que tamén contempla a incorporación da administración electrónica.
