A provincia de Lugo atópase á cola exportadora en Galicia, ao situarse como a cuarta provincia ao ser pasada por Ourense, segundo os datos recompilados no estudo realizado pola Confederación de Empresarios de Lugo (CEL) e financiado pola Deputación provincial, ‘Lugo e os mercados exteriores’.
Na firma dun novo convenio que lle reporta á CEL 130.000 euros, o secretario xeral da patronal lucense, Jaime López resaltou que “a Deputación foi a administración de referencia para a consolidación de empresas en Lugo, foi non unha porta aberta senón unha porta permanentemente aberta”.
A provincia de Lugo alcanzou os seus mellores resultados de exportacións en 2015, e desde 2016 mantéñense “estables” ao redor dos 640 millóns de euros. O documento sinala que se mellorou o saldo comercial, pasouse dun déficit en canto a balance comercial da provincia de 507 millóns en 2009 a máis de 70 en 2018.
As exportacións e importacións concéntranse sobre todo na Unión Europea, máis do 85 por cento e do 50 do total respectivamente, con exportacións na súa maioría relacionadas coa alimentación, segundo recolle o estudo.
“Tal e como dixemos cando aprobamos os orzamentos para 2020, unha das principais liñas de actuación pasan polo impulso dos sectores produtivos”, manifestou o presidente da Deputación de Lugo, José Tomé. Así, valorou que se axuda a “fixar poboación”, á vez que destacou que o seu goberno leva investidos máis de sete millóns de euros en plans de emprego e para emprendedores.
Finalmente, o secretario xeral da CEL, Jaime López, sobre o Brexit alertou de que “vai ser máis caro” exportar ao Reino Unido, polo que haberá que buscar outros mercado á vez que urxiu a necesidade de que se ” internacionalicen” aínda máis as empresas lucenses.
