A dirección do PP provincial de Lugo nomeou á deputada autonómica Sandra Vázquez presidenta da xestora do partido en Vilalba. Isto ocorre despois de que o ata agora líder municipal, o exalcalde Agustín Baamonde, presentase a súa renuncia.
Segundo indica a formación, así o trasladou a presidenta provincial, Elena Candia, despois de manter unha reunión co comité executivo local, na que Baamonde informou da súa decisión. No entanto, continuará como concelleiro e como deputado provincial.
Tras 40 anos de maiorías absolutas consecutivas na corporación, o xa expresidente local perdeuna nas eleccións do 26 de maio tras ser alcalde en dous períodos: entre 1991 e 2005, e entre 2016 e 2019. Este feito foi bastante simbólico debido a que Vilalba é o lugar de nacemento do fundador do partido, Manuel Fraga.
Neste contexto, Agustín Baamonde sinalou que o cambio na dirección local “responde á necesidade de dar paso a outras caras á fronte do partido despois de que o PP non lograse revalidar a maioría absoluta dos últimos 40 anos” no municipio.
Así, Elena Candia valorou que a xestora abrirá “unha nova etapa co obxectivo de reactivar a formación da vila natal de Manuel Fraga“. Non en balde, lembrou que o PP obtivo na capital da Terra Chá máis do 40 por cento dos votos nas eleccións xerais tanto do 28 de abril como do 10 de novembro.
A presidenta dos populares lucenses tamén destacou a figura de Agustín Baamonde como “persoa de partido e, sobre todo, persoa entregada aos vilalbeses”. Ademais, subliñou o “compromiso e a responsabilidade” da deputada Sandra Vázquez, que agora se fai cargo da xestora local.
Vázquez, pola súa banda, agradeceu a Candia que confiase na súa persoa “para afrontar este reto”, para o que, engadiu, “conta con toda a familia do PP de Vilalba”, á que agradeceu “o traballo desenvolvido por todos eles, moitas veces de forma desinteresada”.
UN FEUDO HISTÓRICO
Nas eleccións do 26 de maio, os populares obtiveron sete concelleiros fronte ao nove que obtivo en 2015. En fronte, o PSOE subiu de seis a oito actas e Vilalba Aberta conseguiu dúas, o que permitiu que a socialista Elba Veleiro se fixese coa Alcaldía.
En 1983, do mesmo xeito que en 1987, en Vilalba gañou as eleccións Alianza Popular, partido que dous anos despois foi refundado coa marca actual dos populares. A partir de 1991, a dereita ostentou a alcaldía neste municipio, capital da comarca da Terra Chá, xa co PP.
No anterior mandato foi alcalde Agustín Baamonde, que volveu porse á fronte do Concello vilalbés despois de deixar o seu escano no Parlamento galego en 2016 para dar a substitución a Gerardo Criado, que tomou posesión entón como senador nun cambio realizado pola súa formación.
Tras a caída de votos ao PP en Vilalba en 2015, os populares tiñan as súas esperanzas postas na candidatura de Baamonde, que o 26M non logrou reter a absoluta.
