Axentes da Policía Local de Lugo rescataron a unha nena de dous anos que se quedou pechada no coche do seu pai, cando este se baixou do vehículo para atender “unha indisposición” da menor.
Segundo informou a propia Policía Local, un home presentouse ás 11:30 horas na comisaría deste corpo para pedir axuda, porque tras estacionar na Rúa das Artes o seu vehículo para atender “unha indisposición da súa filla de dous anos”, se lle activara o sistema de peche do vehículo coas chaves dentro”.
Até o lugar indicado de desprazaron inmediatamente efectivos da Unidade de Atestados, que tentaron abrir as portas do vehículo “con varias técnicas” para acceder á menor, que estaba sentada no sistema de retención infantil colocado no asento traseiro do vehículo.
Ao ver que os seus intentos non daban resultados e que “a nena volvía porse indisposta”, finalmente os axentes optaron por “romper o cristal dianteiro esquerdo”, que era o máis apartado da menor. Así lograron acceder ao interior do vehículo e rescatar á nena.
