O Festiva Incívico naceu en 2018 en Lugo como resposta á denominada “Ordenanza Mordaza”, que finalmente non foi aprobada grazas á protesta cidadá, e que pretendía restrinxir o uso do espazo público e as actividades das artistas e dos colectivos sociais e políticos na rúa.
“O obxectivo do Festival Incívico non é outro que encher de vida as prazas, de forma non lucrativa, e organizarse cos veciños e veciñas dos barrios para facer vida en comunidade, rompendo cos esquemas do hiperindividualismo que impera na actualidade”, apuntan os seus organizadores.
E este ano, ademais, querían que concidira esta fin de semana pola celebración do Caudal Fest. Un xeito de protesta contra os macrofestivais financiados con diñeiro público “que irán directamente a enriquecer á empresa privada” –este ano o concello destinou máis de 300.000 euros–. Pero o mal tempo fixo que se cambiara a data orixinal, que era este sábado.
MACROFESTIVAIS: “ACTO DE CONSUMO ESPORÁDICO”
“Ese tipo de festivais entende a cultura como un acto de consumo esporádico e non continuado no ano, pois os cartos investidos neste macrofestival para o enriquecemento duns poucos vai en detrimento da inversión na cultura local”, critican os organizadores do Festival Incívico. Lembran que a cultural local “manténse viva a cidade os 364 días do ano restantes” e que deixa, a diferenza deste tipo de eventos, “unha pegada non monetaria que non só debe terse en conta, senón que debe ser o piar fundamental na xestión cultural”.
Este ano o festival inclúe actividades de todo tipo e para todas as idades. Tamén haberá tempo para a reflexión e o debate, acerca das redes de apoio e da noción de barrio, eses focos de espazo físico e de resistencia na urbe capitalista. Terá lugar no Festival unha exposición fotografía permanente de Xosé Marra, Belén Cordero, Pedro Agrelo, David Vazq., A. Pallón, Llum A.González, Rodrigo Díaz, Nery e Alfredo Bongianni.
Tamén, de forma permanente, haberá xogos tradicionais galegos para adultos (como a chave ou os birlos), así como xogos para nenas e nenos. Incorporará ademais o “recuncho do dormilón” para a xente que se queira botar unha sesta na praza, acto que, coa “Ordenanza Mordaza”, queríase multar con ata 750 euros.
Programa:
▪️ 13:30 Sesión Vermú con pinchada de música
▪️ 14:00 Xantar Comunitario con comidas de diferentes países. Trae a túa
e comparte coas demais.
▪️ 16:00 Peza de teatro do Grupo de investigación teatral.
▪️ 16:30 “Saúde e redes de apoio”. Un espazo de aprendizaxe e posta en
común sobre a variable social como determinante de saúde; por Lucía
Cedrón e Uxía Oliveira.
▪️ 17:45 Xogos populares
▪️ 18:15 Presentación do xornal Pensa Lugo
▪️ 19:00 Obradoiro de regueifa/repente.
▪️ 19:45 Aulas de baile ritmo zumba, bachata e hip-hop con Ritmolugo
Escuela de Baile
▪️ 20:45 Música con artistas convidad@s como Pablo, Jandro e máis…
Haberá micro libre para as persoas que se animen a cantar.
