A Policía Nacional detivo este fin de semana a unha muller por causar altercados en dous locais de lecer da cidade de Lugo, onde agrediu a clientes.
Segundo informou a Policía Nacional, na madrugada do pasado domingo recibiuse unha chamada na sala do 091 para avisar de que unha muller agredía aos clientes dun local de copas. Personados no lugar, axentes identificaron a esta persoa, que se ausentou do lugar.
“Xa entrada a mañá recíbese de novo aviso na sala do 091 de que unha muller esta moi alterada noutro local próximo, na zona da igrexa de San Antonio”, relataron as mesmas fontes, que abundaron que se trataba da mesma persoa que antes.
Os policías solicitaron á muller a documentación, ante o que se negou e ameazou e insultou aos axentes actuantes. Por iso foi finalmente detida por un delito de atentado resistencia e desobediencia, tras o que pasou a disposición xudicial.
