Un total de 13 persoas faleceron o pasado ano nas estradas da provincia de Lugo polo uso do telefono móbil ao volante, segundo os datos ofrecidos pola subdelegada do Goberno, Isabel Rodríguez, durante a presentación dunha campaña de concienciación sobre os riscos de atender o móbil mentres se conduce.
A Dirección Xeral de Tráfico e a Garda Civil desenvolverán entre o vindeiro luns 16 e o 22 de setembro a campaña nas estradas da provincia coincidindo cunhas datas nas que, hai un ano, se producían nove vítimas mortais en oito accidentes, cinco deles producidos por distraccións ao volante.
“O móbil é estupendo para pedir axuda en caso dunha emerxencia, pero usalo mentres se conduce un vehículo ou se cruza unha rúa é un auténtico perigo”, resaltou Isabel Rodríguez, que puxo o foco en que o 45% dos accidentes con vítimas mortais rexistrados en Lugo o pasado ano foron por distraccións.
No que vai de ano, segundo as cifras de Tráfico, o factor da distracción interveu en máis da terceira parte dos accidentes mortais das vías lucenses, nos que faleceron catro persoas.
Pola súa banda, o xefe provincial de Tráfico, Ángel Álvarez, incidiu en que existen estudos que afirman que o uso do móbil aumenta entre tres e catro veces o risco de colisión.
Ademais, despois dun minuto e medio falando por teléfono mesmo cun sistema de mans libres, o condutor deixa de percibir o 40% dos sinais, a súa media de velocidade baixa un 12%, o ritmo cardíaco acelérase “bruscamente” e increméntase o tempo de reacción.
Con todo, Álvarez alertou que o teléfono móbil “non é a única causa” das distraccións ao volante. Usar indebidamente o navegador, fumar, mirar un mapa ou colocar un obxecto no habitáculo do vehículo tamén aumental o risco de sufrir un accidente de circulación.
