A Deputación de Lugo reabriu este mércores a circulación na ponte de Uriz, en Begonte, logo do afundimento do firme. O tráfico quedara restrinxido o pasado luns 14. Unha semana máis tarde, o ente provincial poñíase mans á obra para arranxar a vía, unhas actuacións que remataron en tres días.

Os traballos na LU-P-15101 arrancaron o luns e concluíron na tarde de onte. Consistiron no baleirado e rexeneración con formigón na parte da calzada que se afundira. Así mesmo, o firme foi reconstruído posteriormente con aglomerado. Estímase que esta intervención suporá un custo de 10.000 euros.