A concelleira de Cultura, Turismo e Promoción da Lingua, Maite Ferreiro, presentou o programa de actividades ‘O que queda de verán’, dirixido a un público familiar. Esta iniciativa desenvolverase as tardes dos xoves dende mañá, 22 de agosto, ata o vindeiro 12 de setembro. As propostas inclúen obradoiros creativos e espectáculos, todos eles ubicados no patio do Vello Cárcere de Lugo.
‘O que queda de verán’ estréase mañá cun obradoiro de creación de instrumentos musicais con materiais de refugallo. Tamén haberá tempo para gozar do espectáculo ‘Cores, contos e Rock and Roll’, do Pakolas. A interacción coas nenas e nenos, a música e as cores e debuxos en directo da artista Laura Romero serán os principais atractivos para o público.
Do mesmo xeito, as actividades programadas para o día 29 contemplan un obradoiro de globofexia e unha actuación de Cozorellos Salvaxes, un grupo musical infantil que aborda os temas da homofobia e o racismo. A través das súas cancións, procuran concienciar en base ao feminismo e á diversidade.
No mes de setembro, en concreto o día 5, será tempo para un taller de traballos manuais de temática circense. Tamén actuará Martiña Soñadora, con Sabela King e Carlos Gil, unha ocasión para que as crianzas bailen ritmos brasileiros e portugueses, rock and roll e mesmo blues en galego e francés.
O programa de actividades péchase o 12 de setembro cun obradoiro de pintura e investigación en familia, que será impartido pola asociación socio-educatia Antonio Gandoy. O broche de ouro poñerano Diego Maceiras e Gloria Mosquera coa súa actuación ‘Contos para un mundo mellor’. O medo, o coidado da natureza, a empatía, a prudencia ou a cooperación serán algunhas das temáticas que aborden.
