O cinema galego está a vivir un momento de gloria que semella ter máis recoñecemento alén das nosas fronteiras ca dentro delas. Logo do éxito acadado en Cannes polo filme O que arde (Oliver Laxe) —e por unha das súas protagonistas, a corguesa Benedicta Sánchez— , outro director lugués competirá no estranxeiro cunha produción realizada na nosa terra. El é Eloy Enciso (Meira, 1975), que viaxará ao festival de cine de Locarno, en Suíza, coa súa película Longa noite.
O traballo deste meirego sitúanos nos montes de Lugo durante a posguerra, unha época sobre a que o director cre que non se profundou moito. O discorrer da Transición soterrou historias e acalou outras coma quen quere facer que nunca existiron. Longa noite sitúa o foco (e o obxectivo da cámara) xusto nese lugar e nese tempo silenciado. O filme furga na memoria histórica, pero evita falar de vencedores e vencidos na Guerra Civil. No canto diso, céntrase nas consecuencias posteriores, reflectidas nas vivencias de Anxo, un home que ben podería representar a moitos protagonistas reais daquel período.
Anxo volve á súa vila, na Terra Chá, uns anos despois de rematar a contenda bélica, durante a que estivera fuxido. Daquela, bate de fronte con todos os cambios que esta provocou, máis alá dos evidentes. As relacións entre as persoas xa non eran as mesmas, por exemplo, e quizais nunca volveran a recuperarse do mesmo xeito. Todo mudara. A sociedade tivo que reconstruírse a si mesma.
CINEASTAS GALEGOS EN LOCARNO
Eloy Enciso decidiu rodar practicamente todo o filme na provincia de Lugo, aínda que algunhas secuencias foron tomadas en Pontevedra. Baamonde, Vilalba, Portomarín ou Samos foron algúns dos lugares da provincia que tornaron en plató para a realización da película.
É a segunda vez que este director de Meira participa no festival de Locarno. Na primeira ocasión, fixérao coa longametraxe Arraianos, presentada na sección ‘Cineasti del presente’. Desta volta, competirá polo Leopardo de Ouro canda outras quince propostas internacionais.
Así e todo, non é o único representante de Galicia no festival suízo, que se está a celebrar durante toda esta semana. E é que Álvaro Gago tamén levará a produción cinematográfica galega e en galego a Locarno, da man da súa curtametraxe 16 de decembro.
