Logo de que o PP acusase o BNG por “falta de traballo” respecto do San Froilán, os nacionalistas expoñen un dos anuncios que fixeron na reunión da Comisión de Festas deste luns. Segundo a edil de Cultura, Maite Ferreiro, os protagonistas das patronais serán os grupos e artistas de Lugo. 

“Estamos a traballar coas propostas que nos fixeron chegar os distintos grupos da corporación”, dixo Maite Ferreiro, que presidiu a xuntanza. Asegurou que dende a súa área se está confeccionando a programación e definindo os espazos. A súa idea é que se lle dea moita importancia ao talento local, de maneira que prevén a presenza de 50 artistas da cidade.

“Os grupos locais actuarán como teloneiros nos concertos dos grupos máis importantes”, polo que poderían actuar nos escenarios principais das festas. “Estamos a escoitar todas as propostas que nos están a chegar porque imos facer desta edición do San Froilán a grande festa do outono galego”, concluíu Maite Ferreiro.