O grupo municipal do PP de Lugo critica o BNG por “pechar as patronais por vacacións” a menos de dous meses para que comece o San Froilán. O concelleiro Javier Vázquez critica que iso é o que queda patente tras a xuntanza da comisión de festas, na que percibiu unha “falta total de traballo e de interese” do goberno polo San Froilán.
Vázquez está convencido de que o único que lle urxiu ao BNG foi a contratación de Def con Dos, cuxo anuncio espertou a polémica na política local. Denuncia que a única actuación pechada para o vindeiro San Froilán estea envolta de fins políticos. Así pois, para os populares a “falta de traballo” dos nacionalistas é evidente, xa que segundo eles só optaron por xerar controversia.
AS PROPOSTAS DO PP
Namentres, o grupo do PP gábase de ter rexistrado xa catro escritos con máis de vinte propostas encamiñadas a facer do San Froilán “unhas festas para todos”. Entre as súas suxerencias está a de crear o premio San Froilán de Ouro, un galardón que recoñecería unha persoa de fóra do concello que traballe a prol do San Froilán ou do municipio en xeral, ben sexa a través da cultura, ciencia, deporte ou calquera outra actividade. “O que buscamos é que o San Froilán medre e se recupere da decadencia dos últimos anos. Queremos darlle un novo aire, polo que pensamos que esta proposta só pode ir encamiñada a facer do San Froilán unha festa máis integradora”, explicou Javier Vázquez.
Ademais diso, o PP presentou diferentes opcións de concertos: Café Quijano, Leiva, Sidecars, Pablo Alborán, India Martínez, Luz Casal, Joaquín Sabina ou Los Sabandeños. Así mesmo, tamén buscan que os máis pequenos coñezan a historia das patronais a través de visitas guiadas á capela de San Froilán da Catedral.
