O Partido Popular de Muras critica a xestión do Concello no que respecta á piscina municipal, que aínda non abriu pese a ter xa o socorrista contratado. Acusan o goberno local, ademais, de non manter en boas condicións as instalacións.
“Estamos xa co verán avanzado e esta instalación está nun estado lamentable. A piscina está sucia. Non a baleiraron e non dan desfeito esta sucidade nin con produtos químicos”, lamenta Eugenia Requeijo, do PP de Muras. Explica que eses son os motivos polos que o Concello non abriu a piscina e pide “que non lle boten a culpa a ninguén; se non fan o que teñen que facer, é responsabilidade deles”.
Así pois, Requeijo trasladou as súas queixas por escrito ao Concello, a única entidade que ten competencia sobre a piscina. Reclaman unha pronta solución, porque “ten ao socorrista mirando para o aire por non actuar como se debe”. Pensan que esta é unha cuestión que ben poderían ter resolto a tempo os edís do goberno. “Teñen tres salarios e nin son capaces de abrir a piscina”, din.
