A Deputación finalizou as obras de reparación da estrada LU-P-1611 ao seu paso polo Corgo, onde se sufrira un afundimento do solo no mes de xaneiro. Así pois, queda restablecido o tráfico neste punto do cinturón comarcal -así se coñece esta vía-. Concretamente, trátase do tramo correspondente á ponte do río Maceda.
O presidente da Deputación en funcións, Darío Campos, supervisou as obras de emerxencia que se executaron no Corgo e para as cales o ente provincial destinou 300.000 euros. Os traballos desenvolvidos na ponte do río Maceda, no punto quilométrico 7.800, consistiron no corte e demolición do firme, a retirada do recheo e dos tubos e a construción de estribos e vigas, ademais da pavimentación. Por último, tamén se repuxo a sinalización e implantáronse novos sistemas de contención do vial, segundo sinalan dende a Deputación.
A LU-P-1611 sufrira un afundimento no mes de xaneiro “por mor do tráfico pesado” que soporta. A raíz diso, o departamento de Vías e Obras da Deputación redactou un proxecto para a súa mellora, coa condición de urxente. Seis meses despois do incidente, queda restablecido o tráfico nesta estrada provincial para todo tipo de vehículos. A Deputación afirma que conta con todas as garantías de seguridade para a súa circulación.
