A que foi ata o de agora voceira autonómica de Ciudadanos Galicia, Olga Louzao, vén de renunciar a ese cargo no medio dun contexto de crise interna do partido en Lugo. Xustifícao alegando que prefire centrarse na política local despois de ser reelixida concelleira.

Así o informou C’s, á vez que asegurou que Louzao non deixará de traballar “por un proxecto no que cre”, en alusión á formación laranxa. Asemade, a xa ex-voceira desexou que este cambio “axude a consolidar unha forza política necesaria para a nosa Comunidade”.

Preguntada por Europa Press, Olga Louzao remitiuse ao comunicado que enviou a dirección da formación, sen engadir novas declaracións. Tan só subliñou que a súa decisión responde á necesidade de centrarse no ámbito local.