Amosarlle á cidadanía os labores e servizos que desempeña a Garda Civil é tamén unha actividade á que se lle dedica un tempo dende este corpo. Neste caso, foron os alumnos do Campus do Rácing Club Vilalbés os que asistiron como público a unha exposición de medios e a unha demostración da Garda Civil. En total, participaron 32 rapaces con idades comprendidas entre os 5 e os 12 anos.
No acto celebrado este mércores 3, que contaba coa colaboración dos Bombeiros e de Cruz Vermella, tamén estiveron presentes a subdelegada do Goberno, Isabel Rodríguez, e a alcaldesa de Vilalba, Elba Veleiro (PSOE). Era o primeiro evento que compartían estas dúas políticas e cadrou que consistía “nunha actividade na que se demostra o compromiso da Garda Civil cos nenos e nenas deste Concello”, segundo expresou Rodríguez, satisfeita.
A subdelegada valorou moi positivamente a actividade que organizou o Campus de Verán do Rácing Club Vilalbés. Coida que é moi importante que “a sociedade, e moi especialmente a mocidade, estea informada” e familiarizada cos servizos que prestan as forzas de seguridade do Estado. Así mesmo, tamén agradeceu o labor que desenvolve a Garda Civil nas escolas para concienciar sobre o acoso, a violencia de xénero ou as estafas.
Pola súa parte, a rexedora de Vilalba tamén agradeceu o compromiso da Garda Civil para fomentar a convivencia e louvou o traballo do Rácing Club Vilalbés a prol do deporte e dos hábitos saudables.
Na exhibición, que se levou a cabo no campo de fútbol Roca de Vilalba, participaron persoal e vehículos de Seguridade Cidadá, de Tráfico e do Seprona, ademais de efectivos da Cruz Vermella e dos Bombeiros.
