Un incendio que se produciu á primeira hora da mañá deste mércores nunha vivenda unifamiliar nas inmediacións da Avenida Vila Verde, na cidade de Lugo, mobilizou aos Bombeiros da cidade e á Policía Local.

Dáse a circunstancia de que a casa incendiada está situada a apenas uns metros do peche perimetral da gardaría Gregorio Sanz, aínda que as chamas non chegaron a achegarse ás instalacións municipais.

Para sufocar o lume, os Bombeiros de Lugo desprazaron ao lugar dous camións e a Policía Local cortou a rúa para evitar riscos e facilitar o traballo dos efectivos. O incendio deixou practicamente destruída a casa, aparentemente deshabitada.

A fumareda provocada polo mesmo podía verse desde a zona de San Cibrao, onde se atopa o HULA, e o fume era claramente perceptible nas zonas sur e leste da cidade.