O Foro Lugo Independiente ( FLI) presentou unha reclamación ante a Xunta Electoral de Zona de Lugo na que solicita o “reconto manual das papeletas” que conseguiu este partido nas eleccións municipais do pasado 26 de maio nesta circunscrición.

O presidente do FLI, Ildefonso Saavedra, fai constar nesa reclamación que a páxina web do Ministerio do Interior outorgáballe ao seu partido “o domingo pola noite e o luns un total de 841 votos, co 100 % do escrutinio realizado”, pero “posteriormente lle foron detraídos desa cantidade un total de 255 votos”, de modo que quedou con só 586.

“Resulta sorprendente que, no ano 2019 e cos avances tecnolóxicos que temos a día de hoxe, se poidan producir tales irregularidades no reconto de votos e na súa posterior transmisión ao público desde a páxina do Ministerio do Interior”, engade o FLI na súa reclamación ante a Xunta Electoral de Zona.

Por todo iso, solicita que “se realice un novo reconto manual, papeleta a papeleta, e con presenza dun representante de Foro Lugo Independiente, dos votos obtidos” por esta formación na circunscrición electoral.