O experimento político do ex presidente da Deputación de Lugo, Manuel Martínez, Galicia Sempre, quedou en nada. O seu obxectivo de ser chave na institución provincial para amargarlle a vida ao seu ex partido resultou un desastre.
O único gran logro da marca política impulsada polo exsocialista foi manter a maioría absoluta en Becerreá, onde xa a tiña. Tamén conseguiu entrar noutros dous concellos da provincia de Lugo nas eleccións deste domingo. E pouco máis.
O tamén presidente de Suplusa foi participe de diversos momentos de conflito co grupo provincial socialista de Lugo, marcadamente o último pleno da Deputación, no que protagonizou un tenso enfrontamento verbal co alcalde de Pol, Lino Rodríguez.
Martínez tamén foi a persoa que recentemente desvelou a investigación xudicial ao presidente da Deputación, Darío Campos, pola denegación de permisos para unhas obras no concello da Pontenova.
A nova marca política de Martínez entrou en Meira, coa candidatura liderada por Enrique Castro, que contará cun representante no arco municipal, do mesmo xeito que en Sarria, lista liderada por Benjamín Escontrela.
A formación tamén se presentaba noutras dúas localidades, nas que non conseguiron representación. Así, en Lugo (con Carmen González á fronte), Galicia Sempre obtivo o 1,32 por cento dos sufraxios, mentres que en Burela, coa marca Burela Sempre e Carlos Peiteou liderando a lista, o 6,03 por cento.
