A ex-ministra de Traballo Fátima Báñez (PP) afirmou que “en dez meses” de Goberno do Partido Socialista a provincia de Lugo “crece a metade do que o facía” durante a etapa de Mariano Rajoy na Moncloa.
Así o indicou este martes tras manter un encontro con pensionistas de Vilalba no que estivo acompañada por Jaime de Olano e José Manuel Barreiro, candidatos do PP por Lugo nas eleccións xerais do próximo domingo.
A que foi responsable de Traballo durante o seis anos e medio que permaneceu Mariano Rajoy como presidente do Goberno enxalzou as políticas impulsadas polo Executivo do que formou parte.
Neste sentido, asegurou que as pensións creceron na provincia de Lugo desde o ano 2012 “unha media do 19%” e que “4.500 mulleres da provincia” se viron beneficiadas das prestacións de viuvez aprobadas durante a etapa de Rajoy.
A “senda positiva” que, segundo Báñez, deixou o Goberno popular “está a porse en risco coa ameaza de suba de impostos”, o que provoca que “en dez meses Lugo creza a metade do que o facía con Rajoy”.
“Lamentablemente, a xente volve ter incerteza. Así o demostran as enquisas, nas que o 62 por cento dos enquisados din que a súa maior preocupación é o paro e o 57 por cento que a economía vai a peor”, aseverou Báñez.
