Un home resultou ferido e tivo que ser liberado do interior do vehículo no que viaxaba tras un choque con outro turismo en Cospeito (Lugo), indicaron fontes do 112. O accidente rexistrouse na estrada LU-111, no quilómetro 14, dentro de Cospeito. Un particular avisou do ocorrido ao redor das 20,30 horas do sábado cunha chamada ao 112, na que explicaba que había unha persoa atrapada nun dos vehículos.

Foron mobilizados Urxencias Sanitarias de Galicia-061, que pediu a asistencia do helicóptero medicalizado con base en Santiago, e os bombeiros de Vilalba e a Garda Civil. Os bombeiros indicaron que o home ferido foi rescatado do interior do coche e puido ser atendido polo persoal sanitario, que finalmente o trasladou a un hospital en ambulancia.

Ao lugar desprazouse tamén un equipo da Axencia Galega de Infraestruturas para limpar a vía e recuperar as condicións de seguridade para a circulación.