Once persoas celebraban unha festa na zona do Rato, en Lugo, pese ao estado de alarma

Todos foron sancionados, pero tres deles tamén foron detidos ao ser reincidentes.

Coche de Policía Nacional. ARQUIVO

Axentes da Policía Nacional detiveron o mércores a tres homes con idades comprendidas entre os 24 e 40 anos, por celebrar unha festa nun predio dunha casa de Lugo pese ao estado de alarma. Estes individuos xa foran sancionados pola mañá.

Segundo informou a Policía Nacional, os feitos ocorreron á primeira hora da tarde deste mércores. A tarvés dunha chamada á sala do 091 da Comisaría Provincial, alertaron de que se estaba a celebrar “unha festa ou reunión lúdico festiva” no Paseo do Rato.

Por ese motivo, presentáronse no lugar varias dotacións policiais, que comprobaron que había “11 persoas celebrando unha festa na zona exterior da vivenda”, polo que os axentes procederon a denunciar a todos eles por incumprimento da orde decretada no estado de alarma imposto desde o pasado día 14.

Como tres dos identificados xa foran advertidos e denunciados polo incumprimento no mesmo día, procedeuse á súa detención por un delito de desobediencia. De todo iso informou a Policía Nacional ao xulgado de garda, xunto coas actuacións practicadas.