Efectivos de emerxencias localizaron a unha muller de 73 anos de idade que permanecía desaparecida desde a tarde deste domingo día 6 no termo municipal de Guitiriz (Lugo).
Segundo informaron fontes de Protección Civil, na mañá deste luns foi localizada a muller nunha zona de maleza preto do seu domicilio. Dstaba “desorientada pero en aparente bo estado de saúde”. No entanto, apuntaron, foi trasladada a un centro sanitario para a realización das probas “sanitarias pertinentes”.
A desaparecida, de 73 anos e veciña da parroquia de San Salvador de Parga, desapareceu na tarde deste domingo e a súa familia avisou ao 112 sobre as 17,00 horas. A muller, destacan fontes municipais, ten “boa mobilidade”, mediana estatura e complexión delgada.
A Garda Civil e Protección Civil de Guitiriz colaboraron desde este domingo pola tarde nun dispositivo de busca que localizou á muller con vida na mañá deste luns.
