O PSOE denuncia “irregularidades” no censo electoral de Rábade e a OCE anula 15 posibles votantes

A OCE determina que esas persoas non residen no municipio ou que non puideron verificalo, así que deberán votar na súa anterior circunscrición electoral.

Comité provincial do PSdeG-PSOE coa presenza de Darío Campos, Lara Méndez, Álvaro Santos, José Tomé e outros alcaldes e dirixentes da provincia / PSdeG

A Oficina do Censo Electoral (OCE) anulou 15 posibles votantes en Rábade tras unha impugnación presentada esta semana polo PSOE, que solicitaran a invalidación do censo para as eleccións xerais “polo incremento de residentes significativo e inxustificado no último semestre de 2018”.

Segundo informaron os socialistas de Lugo nun comunicado, “a OCE explica na resolución que o Concello de Rábade (gobernado por un grupo de independentes), tras as investigacións realizadas, determinou que 15 persoas non residen no municipio ou non puideron verificar a súa residencia”. Como consecuencia, “a OCE decidiu retrotraer estes cidadáns á súa anterior circunscrición municipal, polo que non poderán votar no Concello de Rábade”.

O PSOE informou de que “as persoas afectadas teñen a posibilidade de presentar un recurso contencioso administrativo nun prazo de cinco días”. Ademais, os socialistas valoraron “positivamente” o ditame da OCE xa que “asegura a integridade nas votacións para as eleccións xerais”, e lamentaron que se produzan unhas irregularidades que “ensucian a imaxe da política”.