As persoas hospitalizadas pola Covid-19 volven superar os 500 en Galicia ao aumentar a 517, que implican 20 máis que no inicio desta semana, mentres que os casos activos descenden por segunda xornada consecutiva ata os 10.420, que supoñen 86 menos, tras detectarse 919 novos contaxios. En canto á taxa de positividade, descende a un 32,6 por cento no conxunto de Galicia.
Segundo os datos actualizados este martes pola Consellería de Sanidade, con rexistros ata as 18,00 horas do luns, recollidos por Europa Press, aumentan a 15 os pacientes en UCI pola Covid-19 en Galicia –un máis– e a 502 os hospitalizados noutras unidades –19 máis–, mentres que 9.903 pacientes permanecen en seguimento no seu domicilio. Hai unha semana, o martes 14 de xuño, había 430 ingresados, 15 deles en UCI.
Por áreas sanitarias, a presión hospitalaria incrementase na de Lugo, con dous pacientes hospitalizados pola Covid en UCI –un máis– e soben a 62 os ingresados noutras unidades por este coronavirus –dous máis–.
CASOS EN ASCENSO
Por segunda xornada consecutiva os casos activos de Covid-19 descenden ata situarse nos 10.420, que implican 86 menos, ao haber máis altas (1.001) que contaxios (919), ao que se suman catro falecementos. O martes 14 de xuño había 8.976 infeccións activas. Por áreas, os casos soben en Lugo (+35), co que o número total de casos activos é de 1.252.
