Cinco menores fúganse do Santo Anxo de Rábade e provocan desfeitas no edificio

Axentes da Policía Nacional localizaron os rapaces de noite e trasladáronos de volta ao centro.

O centro de menores Santo Anxo, en Rábade.

Cinco menores do centro Santo Anxo de Rábade protagonizaron unha fuga durante este domingo, tras provocar diversos danos e desfeitas no propio inmoble.

Os cinco rapaces escaparon á primeira hora da tarde, tras coñecer que non tiñan permiso para saír durante este fin de semana. Foron localizados por axentes da Policía Nacional durante a noite e foron devoltos ao centro.

Segundo indican fontes de Política Social a Europa Press, os participantes na fuga xa romperan varios cristais e provocaran danos no inmoble a noite anterior.

O centro rexistrou diversos altercados e intentos de fuga durante estas xornadas, sobre todo ante as restricións pola crise sanitaria. Esta situación obrigou a incrementar as medidas de seguridade no centro, aínda que parte dos menores atópanse coas súas familias desde o inicio do estado de alarma.