O meteorólogo e físico lucense Martín Barreiro foi designado de novo pola Deputación de Lugo como ‘embaixador do turismo’ da provincia para “o desenvolvemento de accións de promoción e consolidación da marca Lugo Cambia“.
Tras a xunta de goberno, a portavoz socialista do bipartito provincial (PSOE e BNG), Pilar García Porto, deu conta da contratación e subliñou que “se lle dá continuidade á imaxe de Martín Barreiro, que é o home do tempo, ese físico e presentador de televisión que é lucense”.
Porto precisou que o que se busca é “desenvolver accións de promoción e de consolidación da marca turística Lugo Cambia, que foi creada dentro do Plan Estratéxico de Turismo”.
“Cremos que unha persoa como Martín Barreiro, moi recoñecido socialmente a nivel nacional, pode ofrecer unha imaxe positiva e de moita creatividade, ademais, con moitos dotes comunicativas, que é algo a ter en conta”, sinalou.
Ao seu xuízo, “isto contribúe de forma moi importante a proxectar a imaxe da provincia”. “O importe deste contrato ascende a case 16.000 euros”, concretou.