“Ciudadanos está implantado legalmente en Monforte, Guitiriz, Chantada e Outeiro”

Laureano Bermejo, secretario de organización de Ciudadanos en Galicia, dá conta da expansión e os obxectivos da formación na provincia de Lugo

Laureano Bermejo, secretario de organización de Ciudadanos en Galicia
Laureano Bermejo, secretario de organización de Ciudadanos en Galicia .

Forma parte da renovación efectuada na executiva galega de Ciudadanos, onde ocupa a secretaría de organización. Laureano Bermejo é propietario dun negocio de autoescola e foi outrora cabeza de cartel de UPyD por Ourense, nos comicios autonómicos de 2012. Na actualidade, adica as súas enerxías a construír os equipos da formación por toda a provincia de Lugo, pola que apostarán de xeito decidido nas vindeiras eleccións municipais.

Partindo de Lugo e agora Sarria, Ciudadanos planea expandirse a Monforte, Guitiriz, Outeiro, O Corgo… cales son os vindeiros pasos?

Ata agora estabamos implantados en Lugo e en toda a zona da Mariña, e agora comezamos a expansión. O primeiro grupo local que se abriu foi o de Sarria, pero temos en Chantada, Monforte, Guitiriz e Outeiro xa ás portas. De feito, legalmente xa están implantados, só falta a presentación pública.

Cantas candidaturas haberá na provincia? Porque estamos xa a menos dun ano para as municipais.

O noso obxectivo é presentarnos en 18 ou 20 concellos, coa intención de seguir subindo. A verdade é que tampouco me poño un obxectivo claro nin tampouco un límite; a medida que vanse abrindo os grupos locais, realízase un efecto chamada sobre a xente derredor. É curioso, porque realmente é a xente a que nos chama para solicitarnos que nos implantemos nos seus concellos.

Estes equipos serán nomeados pola directiva, como sucedeu en Sarria, ou abrirase un espazo de participación para a militancia?

Nos grupos locais, seguindo o regulamento da organización, é a secretaría de organización a que nomea a xunta directiva. No intre en que pasen a ser agrupacións, a xunta directiva será elixida nun proceso de votación e listas pechadas. Pero o paso previo da agrupación é o grupo local, e niso estamos. Cando cumpran os requisitos, seguindo o seu regulamento, serán as agrupacións as que elixan a xunta directiva.

Cal será o perfil, o tipo de candidato destes equipos?

A xente é a primeira que se pon en contacto con nós. Temos entrevistas coa xente que quere participar do proxecto, e o que vemos é que a xente ten iniciativas de cara a Ciudadanos, comulga coas ideas de Ciudadanos, participa, cre no ideario e que comparte o noso sentir da política.

É un sentir moi normal, de xente tradicional que ten o seu traballo e o seu xeito de vivir, xente que vén do ámbito profesional, non son políticos de profesión. Ven que pódense mellorar algunhas cousas e toman a decisión de participar de xeito activo nun proxecto político.

Non buscamos un perfil político, como fan outros partidos. Buscamos xente con capacidade de escoitar aos seus veciños e capacidade de resolución de problemas.

E que hai da incorporación de Jacobo Vázquez, ex de Terra Galega? Responde a este perfil?

A verdade é que é un rapaz que, cando falamos con el, pareceume moi interesante, ten unhas ideas moi axeitadas. Ten escoita, valoración e resolución de problemas. Estivemos observando a súa traxectoria e o seu vencellamento a outro partido, pero tamén a súa participación na vida pública.

É unha persoa cunha gran aceptación entre a xente, na rúa. É un pouco o que procuramos. Sería incongruente pechar as portas a xente por vir doutro partido político cando o que estaríamos a facer, ao mellor, sería desprezar talento. O que queremos é sumar equipos, xente con capacidade para resolver problemas.

Como valoran o traballo feito en Lugo, a punta de lanza na provincia e a nivel Galicia?

A valoración que temos é moi positiva. Con Olga Louzao á cabeza da agrupación, os resultados foron moi bos e así están reflictidos nas enquisas, que indican unha consolidación con cinco concelleiros. E aspiramos á alcaldía de Lugo. Aspiramos porque vexo que a xente pola rúa para a Olga, pregúntalle, a anima a seguir. Ciudadanos vai pór todo, vai facer un esforzo moi importante no Concello de Lugo para que Olga sexa a vindeira alcaldesa.

A voceira Olga Louzao, o ex de Terra Galega Jacobo Vázquez, e Juan Vidal-Pardo, coordinador de Ciudadanos en Lugo
A voceira Olga Louzao, o ex de Terra Galega Jacobo Vázquez, e Juan Vidal-Pardo, coordinador de Ciudadanos en Lugo

Falemos do que aprendeu Ciudadanos dende as anteriores municipais. Que fará distinto a formación a nivel local?

No ano 2015, Ciudadanos era un partido moi novo en Galicia. A xente votounos pero non nos coñecía como o fai agora, cando a xente ve a Ciudadanos como un equipo consolidado, un partido no que se pode confiar. Non só en Galicia ou en Lugo, en toda España, e así o demostran as enquisas. É un partido destinado a gobernar o país, e o mesmo pasará nas municipais. Así o ven os cidadáns de Lugo.

O que están a procurar é un partido novo con ideas novas, porque a situación en Lugo a ninguén se lle escapa que é moi complicada. A situación da alcaldesa de Lugo non lle favorece para nada, hai cousa de cinco meses estiveron a piques de facerlle unha moción de censura. O equipo de goberno non funciona.

É normal que os veciños busquen un partido novo, que non teña problemas con respecto á corrupción –poderiamos pensar no Partido Popular–, nin problemas na xestión –como o Partido Socialista– ou problemas doutros partidos, que non souberon trasladar esa imaxe e os resultados foron negativos. É a hora de Ciudadanos, de que Lugo teña unha alcaldesa de Ciudadanos.

O certo é que a Ciudadanos costoulle máis entrar en Galicia ca noutros territorios.

Eu non penso que costara máis. Si que é certo que Ciudadanos ten un percorrido nacional relativamente curto. Pero peor entrada tiña, ao mellor, en Cataluña, e foi o partido que gañou as eleccións. Os resultados das votacións están aí. Cando a xente me pregunta, non falo de enquisas nin valoracións, imos esperar aos resultados. En Cataluña, cun millón cen mil votos foi o partido máis votado.

En Galicia non vexo un problema de penetración. A nosa mensaxe é ben recibida, é unha mensaxe directa, clara e de sentido común, moi aceptada pola sociedade, que fai eco dunhas políticas de sentido común. Os problemas á hora de entrar son parte da xuventude, e atendendo ao xeito de pensar que temos os galegos, con certo receo ao novo. Ata que non se asenta a idea, hai distanciamento. Pero cando vén que chegas con boas intencións e un bo xeito, a xente acéptate. O nivel de aceptación será importante nas eleccións do ano que vén.

E non sorprende que sexa precisamente Lugo, con moito territorio interior e con dispersión poboacional, onde Ciudadanos acadou esta representación?

Iso demostra que un bo proxecto e unha boa xestión consolidará os bos resultados que xa tivemos en Lugo. Se os concelleiros de Ciudadanos non estiveran a altura das expectativas creadas no seu día, seguramente non teriamos esta boa valoración dos concelleiros de Lugo e non teriamos a oportunidade de loitar pola alcaldía.

Pasa o mesmo a nivel nacional, repito, é o mesmo que sucedeu en Cataluña, con 3, 5, 11… ata chegar ao número de parlamentarios da actualidade. E igual cos deputados nacionais, a xente ve que o traballo de 32 deputados é moi importante, e que estamos a facer máis cousas ca outros que teñen unha cifra maior.

Vemos o rendimento dos concelleiros e deputados nosos, en número de proposicións e proxectos, e miramos que outros fan moi pouco e limítanse a votar –ás veces, trabucándose, como sucedeu coa votación da Televisión Española–. Vendo os resultados das nosas iniciativas, as cousas funcionan.

O votante sabe quen traballa e quen non. E cando depositas un voto nunha urna, queres que traballe para ti. Se en Lugo temos estas aspiracións e estas previsións, é porque pálpase no ambiente. O traballo tanto de Olga como de Suso foi moi valorado.

Será suficente para acadar a Deputación de Lugo?

Nun terreo como a Deputación non entramos. Unha das premisas de Ciudadanos é a eliminación das deputacións, porque non queremos duplicidade de administracións, non é beneficiosa. Foron creadas cunha finalidade determinada que non cumpren. Temos que revisar o modelo. Centrarémonos nos concellos nos que ímonos presentar, centrarémonos en conseguir alcaldías e representación nos concellos.

Cando estarán pechados os equipos para os distintos concellos?

Despois de verán comezaremos coa precampaña. O comité autonómico presentará os candidatos para as distintas alcaldías en xaneiro. A partir de aí, quedarán configurados os equipos adicados a confeccionar as listas electorais.

1 COMENTARIO

DEIXAR UN COMENTARIO

Please enter your comment!
Please enter your name here