O exministro socialista José Blanco (Palas de Rei) entrará no Consello de Administración da compañía de gas natural Enagás, unha fichaxe que terá que ser ratificada pola xunta xeral de accionistas no mes de xuño.
Fontes da compañía declinaron realizar ningún tipo de comentario respecto da posible entrada no seu consello de administración de Pepe Blanco. O mesmo fixeron coa incorporación doutro exministro do PSOE, José Montilla, e coa de Cristóbal José Gallego, membro da Comisión de Expertos para a transición enerxética impulsada polo Goberno de Mariano Rajoy e do Observatorio Crítico da Enerxía afín a Podemos segundo fontes consultadas por Europa Press.
NOUTRAS EMPRESAS
Pepe Blanco foi ministro de Fomento durante a etapa de Zapatero, entre o 2009 e o 2011, tras ter sido nomeado vicesecretario xeral do PSOE no 2008 e secretario de Organización socialista oito anos antes.
No pasado mes de novembro, Blanco pasaba a converterse no director executivo de Acento Asuntos Públicos, unha consultora de intermediación entre empresas privadas e institucións públicas. Aos ollos do palense, non se trataba dunha porta xiratoria: “Non vou a unha grande empresa, é unha nova”, xustificaba en El Progreso.
