Fegamp e Concello de Lugo piden “máis investimentos e recursos” para os municipios

Aseguran que cada vez asumen "máis competencias" que lle son "impropias".

A alcaldesa de Lugo, Lara Méndez, e o presidente da Federación Galega Municipios e Provincias (Fegamp), Alberto Varela, nunha reunión.. CONCELLO DE LUGO

O presidente da Federación Galega de Municipios e Provincias (Fegamp), Alberto Varela, e a alcaldesa de Lugo, Lara Méndez, coincidiron en reivindicar “máis investimentos e recursos humanos” para as entidades locais, xa que cada vez asumen “máis competencias” que lle son “impropias”.

Así o manifestaron ambos os mandatarios en declaracións aos medios tras reunirse este venres no Consistorio lucense. Neste contexto, Varela, tamén alcalde de Vilagarcía de Arousa, criticou o “escaso financiamento” que reciben os municipios en comparación aos servizos que prestan.

Diso serviuse para reclamar unha “mellor distribución de competencias”, xa que os concellos, segundo as súas palabras, asumen “cada vez máis” pero “nunca veñen acompañadas do financiamento necesario”. “Iso impídenos prestar servizos públicos de calidade”, engadiu o responsable da Fegamp.

Neste sentido, Lara Méndez valorou que os municipios van “máis aló” das súas atribucións para “solucionar os problemas dos veciños”. A modo de exemplo, a alcaldesa cifrou en 13 millóns –o 13 por cento dos orzamentos– a cantidade que destina o Concello de Lugo a “competencias impropias” como conciliación, políticas sociais e saúde, entre outras.

Paralelo a iso, o presidente da Fegamp afirmou que as administracións locais “achegan o 80 por cento” do diñeiro que se inviste nas “necesidades máis básicas”.

“(As administracións locais) entendemos que se cadra algunha competencia máis podemos asumir, pero teñen que vir apoiadas de investimentos e tamén de recursos humanos”, reclamou finalmente a alcaldesa de Lugo.