O delegado da Xunta de Galicia en Lugo, José Manuel Balseiro, acusou este mércores o Goberno central de “estar a desmantelar” o ferrocarril nesta provincia, coa supresión das máquinas expendedoras de billetes en Sarria, Burela e Viveiro.
En rolda de prensa, Balseiro contrapuxo ese desmantelamento con que o Goberno galego “potencia as instalacións”. “A estación de autobuses de Sarria e Burela vanse remodelar e xa están adxudicadas; e a de Viveiro é a que máis investimento leva de toda a provincia e xa tamén está adxudicada”, presumiu.
“Mentres, o Goberno de España está a desmantelar o ferrocarril, e estao facendo con máquinas de mediana idade que se trasladan a Levante. Para aquí mándannos maquinas que teñen 25 ou 30 anos“, manifestou. Así mesmo, o delegado da Xunta lembrou que “é certo que esta formulación se tentou estando Mariano Rajoy no Goberno, pero houbo unha oposición clara da Xunta de Galicia, que foi a que primou. Neste caso non”.