A coordinadora nacional de Esquera Unida, Eva Solla, denunciou a “situación de desprotección” na que se atopaba o menor de dous meses en Lugo, que foi ingresado de urxencia por signos de malos tratos, e presentará unha batería de preguntas neste órgano para cuestionar á administración.
En concreto, a formación manifestou este venres nun comunicado que a “protección” da infancia polos diferentes poderes públicos é unha “obrigación de especial importancia” para “garantir o bo desenvolvemento vital” dos menores.
Por este motivo, Solla explicou que este caso “é dunha gravidade extrema” e mostra “a existencia de deficiencias na comunicación entre as administracións”. Ao seu xuízo, a “descoordinación” neste tipo de cuestións pon en “perigo” a vida das persoas, polo que “é necesaria a revisión de protocolos para evitar” que se repitan estas situacións.
A deputada por En Marea no Parlamento de Galicia apuntou a que “non foron empregadas todas as vías de comunicación necesarias” para garantir a atención adecuada ante a “vulnerabilidade do menor”. Por todo o anterior, Solla levará unha batería de preguntas para coñecer o contido e funcionamento dos protocolos existentes entre administracións.