O PSOE de Portomarín cualificou a recente visita de Feijóo á vila como “inútil”, xa que “non adquiriu nin un só compromiso” co concello, senón que se ocupou, máis ben, de sacar “retratos”. Refírense ao encontro que mantivo o presidente da Xunta cos usuarios dun campamento de verán no novo Parque Parabéns. Os socialistas lamentan que “veña sacar fotos” en vez de comprobar, por exemplo, o “desastroso estado” deste espazo.
A voceira do PSOE local, Silvia Rodríguez, lembrou que o premio Parabéns -polo que foi remodelado o parque en cuestión- é concedido os Concellos de Galicia para conservar, mellorar e embelecer os núcleos de poboacións por onde pasa o Camiño de Santiago. Porén, “o novo parque da vila non reúne ningún dos obxectivos deste premio”, asegura Rodríguez. “O formigón é o protagonista deste novo espazo, que se pode definir como un auténtico mamotreto”.
Así pois, a voceira socialista pregúntalle a Feijóo “se comprobou o desastroso estado no que quedou a remodelación deste parque, un espazo que non serve absolutamente para nada e onde se investiron 400.000 euros de todos os galegos”. Esta área non conta coas condicións de accesibilidade que marca a normativa, di Rodríguez, pero en vez de preocuparse por iso, Feijóo veu “sacar fotos ao noso concello”.
Pídelle que “se deixen de retratos” e que aproveite as visitas para anunciar compromisos firmes e decididos para facer medrar a economía da vila. “Os veciños e veciñas non precisan campañas de promoción. Portomarín necesita emprego, fixar poboación e boas vías de comunicación”, concluíu.
