Darío Campos nega que cometese prevaricación cando era alcalde

O presidente da Deputación di que ten a "conciencia absolutamente tranquila".

O presidente da Deputación de Lugo, Darío Campos | Óscar Bernárdez
O presidente da Deputación de Lugo, Darío Campos | Óscar Bernárdez

O presidente en funcións da Deputación de Lugo, o socialista Darío Campos, declarou este luns como investigado por un suposto delito de prevaricación administrativa cando ocupaba o posto de alcalde da Pontenova, unha acusación que negou tras asegurar que as actuacións se fixeron con “rigorosidade”.

Por este caso, que analiza licenzas en relación ás obras de saneamento da localidade, foi chamado tamén a declarar como investigado o secretario do municipio lucense da Pontenova, Vicente Pastor, segundo figura na providencia. Está previsto tamén que, no marco desta causa, declaren veciños.

Campos entrou no edificio xudicial pouco despois das 10,00 horas e, tras declarar ante a xuíza, dixo que ten a “conciencia absolutamente tranquila”, deixando claro que as obras se realizaron “baixo o manto da rigorosidade”.

Fontes municipais insistiron en que a denuncia se produciu despois de “denegar unha licenza de obras” debido a que “contaba cos informes técnicos desfavorables”, o que avala a súa actuación.

DENUNCIA

Fontes do Concello da Pontenova apuntaron que a denuncia parte do irmán dun dos integrantes da “candidatura de Galicia Sempre” en Meira, a nova marca política de Manuel Martínez, o alcalde exsocialista de Becerreá e deputado non adscrito na Deputación de Lugo que mantén un enfrontamento co executivo provincial desde o inicio da lexislatura en 2015. Precisamente, foi Manuel Martínez o primeiro en dar conta publicamente desta declaración xudicial.

Martínez permitiu no seu momento a investidura da alcaldesa de Mondoñedo, a popular Elena Candia, despois de que o PSdeG decidise non apostar por el para presidir a institución ante o veto do BNG pola imputación do alcalde Becerreá (o caso foi arquivado en 2016).

Posteriormente, despois de que unha moción de censura levase a Darío Campos a dirixir a Deputación de Lugo, Manuel Martínez rompeu a disciplina de voto dos socialistas en diversas ocasións co que favoreceu, por exemplo, que as competencias sobre as residencias as tivese Suplusa –onde ten maioría o PP–. Todo iso levouno a ser expulsado do PSOE e á súa substitución como vicepresidente provincial.

DEIXAR UN COMENTARIO

Please enter your comment!
Please enter your name here