A Anpa de Baamonde denuncia novos pasos cara ao peche e privatización do centro

A asociación de pais e nais critican que se denegara a admisión de alumnado, así como que se anunciaran as dotacións do conservatorio sen que o anuncio de clausura do colexio sexa oficial

Protesta contra o peche do CEIP de Baamonde | ANPA Baamonde

A veciñanza de Baamonde segue en pé de loita para defender o centro educativo, cuxa supervivencia pende dun fío logo de que o Concello de Begonte aprobara clausuralo e mover o alumnado a outro colexio do municipio. Nestes dous últimos días, a ANPA do Ceip Baamonde denunciou novos pasos que deixan entrever o abandono da escola e o camiño cara a privatización do uso das instalacións. 

Por unha banda, a asociación de pais e nais denuncia que se denegara a admisión de alumnado no colexio. Remitiron un escrito a Inspección Educativa de Lugo e ao conselleiro de Educación, Román Rodríguez, no que se explica que as familias con nenos de tres a cinco anos, que cursarían educación infantil, non puideron presentar a solicitude de admisión. “Estase a vulnerar de forma evidente o dereito de nais e pais”, lamentaban.

Os agravios non rematan aí, senón que a Asociación Músico Crisanto anunciou a dotación de equipamento para o futuro conservatorio, previsto polo Concello de Begonte nas actuais instalacións do colexio. “O rechamante deste anuncio por parte da asociación Músico Crisanto e que anuncian as instalacións como súas cando dende a propia Consellería de Educación non se produciu ninguna desafectación do centro”, sinalan dende a Anpa, para instar ás Administracións públicas a revisar a situación que pon contra as cordas esta escola do rural lugués.

DEIXAR UN COMENTARIO

Please enter your comment!
Please enter your name here