A Garda Civil imputou en calidade de investigado un veciño do termo municipal de Palas de Rei, de 57 anos de idade, como presunto autor dun delito de incendio forestal “por imprudencia grave”.
Segundo informou o Instituto Armado, a investigación correspóndese cun incendio ocorrido na parroquia de Marzá, onde se queimou unha superficie duns 3.500 metros de eucaliptos nitens.
“A raíz da inspección ocular do terreo afectado, confección de informe técnico de posibles causas e entrevista con posibles testemuñas oculares procédese a investigar ao posible autor do delito”, explicaron as mesmas fontes. A persoa investigada foi posta a disposición do Xulgado de Primeira Instancia e Instrución número 1 de Chantada.