Por San Xoán, becerro ao espeto na Piringalla

Como é tradición, repartiranse 3.500 racións nesta festa gastronómica para potenciar este produto autóctono e dinamizar a zona norte da cidade

Presentación da XVIII Festa do Becerro ao Espeto da Piringalla, que se celebrará coma é tradición na noite de San Xoán | Concello de Lugo

A XVIII Festa do Becerro ao Espeto celebrarase coma é tradición na noite de San Xoán. Na presentación desta feira, que comezará ás 21.15 horas na Praza Frai Xosé Gómez, estiveron presentes o presidente da Deputación de Lugo, Darío Campos, a alcaldesa da cidade, Lara Méndez, e os presidentes da Asociación San Isidro da Piringalla, Ricardo Varela, da Asociación de Veciños, Comerciantes e Industriais da Milagrosa, Jesús Vázquez, e da Asociación de Criadores de Vacún de Raza Rubia Galega (ACRUGA), César Dorado.

Este gran evento do barrio da Piringalla terá o seu epicentro este sábado 23 de xuño na Praza Frai Xosé Gómez, entre a rúa Santo Graal e Mar Cantábrico. Deputación e Concello apoian esta cita, que contribúe a dinamizar o municipio, potenciando, por un lado, un produto autóctono, e por outro, fomentando a economía da zona norte da cidade, ao tempo que se fortalecen os espazos de convivencia.

No acto, ao que asistiron unha vintena de veciños e veciñas da zona, Campos apuntou que “é un pracer colaborar dende a Deputación con esta cita gastronómica, totalmente consolidada. Facémolo cunha achega económica de 3.000 euros, dentro da liña de promoción do sector primario e dos produtos autóctonos, o que nos converte na principal administración colaboradora con esta cita gastronómica”.  Neste senso, o presidente da autoridade provincial recoñeceu o “enorme labor” das asociacións organizadoras “que dan mostra do bo facer dos lucenses”.

A alcaldesa de Lugo agradeceulle ao movemento asociativo organizativo e, polo tanto, ao colectivo veciñal, “o maior potencial do municipio”, o seu traballo, tanto por levar a cabo un ano máis esta festa, como por implicarse en facer cidade e en dinamizar Lugo. Así mesmo, Méndez animou á cidadanía a achegarse á Piringalla con esta cita que pon en valor o sector primario, “que temos que empezar a velo como oportunidade e como alternativa de crecemento”, tal e como subliñou a rexedora.

César Dorado amosou a súa satisfacción de doar un becerro ao pobo de Lugo para gozar desta festa, tan consolidada no calendario lugués. Pola súa banda, Jesús Vázquez agradeceu a colaboración da Deputación, do Concello e de ACRUGA que fan posible desenvolver esta feira, que agarda reunir este ano a unhas 8.000 persoas.


3.500 racións, música e unha fogueira

Na XVIII Festa do Becerro ao Espeto, tal e como explicou Ricardo Varela, repartiranse 3.500 racións de dous becerros de raza autóctona (tenreira rubia galega) entre todas as persoas que se acheguen a Frai Xosé Gómez. Esta degustación gratuíta da mellor carne de Galicia tamén irá acompañada con pementos e pan, e de beber, cervexa, viño e refrescos. Para os máis cativos e cativas os organizadores ofrecerán pizza. Ademais haberá unha verbena a cargo do Grupo Bumerang e unha fogueira de San Xoán, a partir das 12 da noite. Para quentar motores, dende as 20:30 horas, actuará o grupo folk Xesta Verde. Tamén haberá un sorteo dun total de 350 euros.   

1 COMENTARIO

DEIXAR UN COMENTARIO

Please enter your comment!
Please enter your name here