Lugo precisará a autorización da Xunta para os proxectos EDUSI

ACE advirte de que todos os proxectos da EDUSI en Lugo serían ilegais sen a autorización pertinente da Xunta, debido a que invaden o terreo histórico do Camiño Primitivo, catalogado coma BIC

Plano do Camiño Primitivo ao seu paso por Lugo

O grupo municipal Alternativa Cidadá de Esquerdas-Esquerda Unida (ACE-EU) advirte de que o goberno local non previu a necesidade de solicitar a obrigada autorización da administración autonómica para executar os proxectos contemplados dentro da EDUSI (Estratexia europea para o Desenvolvemento Urbano Sostible e Integrador) para integrar o centro urbano co Miño, xa que tódalas intervencións plantexadas están dentro do ámbito de territorio histórico do Camiño Primitivo, que está catalogado como BIC (Ben de Interese Cultural) segundo o que dita a Lei de Patrimonio Cultural de Galicia.

O ámbito do Camiño Primitivo foi delimitado mediante o Decreto 267/2012 de 5 de decembro, e calquera intervención dentro do mesmo ten que autorizala a Consellería de Cultura, xa que todas as rutas dos Camiños de Santiago incluídas na Lista do Patrimonio Mundial da UNESCO, na que o Camiño Primitivo se atopa dende 2015, teñen legalmente a consideración de BIC. “O grave é que nin sequera o propio PXOM de Lugo está adaptado á delimitación oficial do Camiño Primitivo aprobada polo decreto de 2012, o que xenera problemas coma o actual e é unha evidencia máis da necesidade dun novo Plan Xeral que respecte o patrimonio e aposte polo urbanismo racional e sostible”, precisou Carlos Portomeñe, voceiro de ACE-EU.

Os proxectos da pasarela que leva ao Anxo Carro, a ampliación do paso soterrado, a reforma da volta da Viña ou a descontaminación e posta en valor do barrio do Carme; todos eles invaden o ámbito delimitado como territorio histórico do Camiño Primitivo, polo tanto, requiren un permiso que o goberno local xa debería ter solicitado, “pois a Xunta ten a potestade legal de ordenar a suspensión de calquera intervención non autorizada nun ben de interese cultural”, e polo tanto podería paralizar a totalidade dos proxectos europeos da EDUSI. Os tramos dos carrís para ciclistas anunciados esta semana que están situados dentro do mesmo ámbito atópanse na mesma situación.

Segundo explicou Potomeñe, ACE-EU confirmou na Comisión de Seguemento da Estratexia DUSI celebrada esta semana que este trámite non foi contemplado polo goberno en ningún momento e que o goberno local non é consciente do que isto supón. De non telo en conta, o goberno estaría cometendo unha neglixencia contra un Patrimonio da Humanidade e incumprindo temerariamente a legalidade, polo que a alcaldesa debería actuar en consecuencia despois de coñecer esta deficiencia e corrixila canto antes”, sinala o concelleiro.

Para a formación, esta é a enésima proba da “irresponsabilidade e improvisación continuas” do equipo de Lara Méndez, que cando contratou a redacción dos estudos de viabilidade e proxectos da EDUSI “debeu ter esixido ás empresas participantes” a formación e cualificación suficiente en materia de investigación, conservación, restauración e rehabilitación para intervir nun ámbito BIC da categoría territorio histórico, coma o é o Camiño Primitivo. “Nos pregos de contratación non se requiriu ese requisito, incumprindo xa deste xeito tamén a Lei de Patrimonio Cultural de Galicia”. 

1 COMENTARIO

DEIXAR UN COMENTARIO

Please enter your comment!
Please enter your name here