A Plataforma contra a impunidade no Caso Carioca tenta que Concello de Lugo e Xunta de Galicia se persoen como acusación popular contra a maior trama de trata de mulleres do Estado. Entenden que o posicionamento da Fiscalía provocará a caída das pezas aínda por investigar, un total corenta e sete, como aconteceu coa vencellada ao club Liverpool do Corgo. Ante o temor de que a maioría dos imputados queden fóra do proceso, anuncian novas accións para motivar o debate político e forzar a intervención institucións públicas.
Logo da proxección do documental Benvidas ao Club, a Plataforma aumenta a presión a través da recollida de sinaturas que comezou este mércores na Praza Maior de Lugo. É o preludio dun inverno quente que aumentará en intensidade e visibilidade despois do Nadal, coa vista nos comicios de maio. Recoñecen que hai escasa garantía en calquera compromiso que poidan facer as institucións.
A situación é a que segue. A Fiscalía desistiu de acusar a unha vintena de investigados na peza principal da operación Carioca, correspondente ao club Queens de Lugo; idéntico proceder tivo cando en decembro de 2017 pediu o arquivo da peza do Liverpool, deixando sen castigo a prostitución de dúas menores. Intúen na Plataforma que contan con dous meses, catro no escenario máis optimista, para evitar que o criterio do Ministerio Público prevaleza e as eventuais penas sexan reducidas á mínima expresión.
Así as cousas, foi tamén a Fiscalía a responsable da separación en múltiples pezas, ralentizando o proceso e desdebuxando a trama. No canto de afrontar unha mafia organizada, converteu o caso nunha suma de delitos illados, reducindo a gravidade dos delitos. Cómpre entender que na Carioca hai involucradas testemuñas protexidas, menores e mulleres sen papeis, algunhas xa de regreso nos países de orixe.
Na Plataforma denuncian que as fiscais –Nuria Fernández Pérez e Belén Quintela López– tentan defender aos axentes das forzas de seguridade do Estado en conivencia coa trama de proxenetismo. Un dos axentes implicados na peza do Liverpool, e que aparece en varias máis, traballaba na unidade encargada de perseguir os delitos de trata. “Iso é o que nos preocupa, que poida seguir traballando con novas vítimas”. “Polo menos, deberían pasar por xuízo e demostrar que non cometeron delito algún”.
A participación da Xunta de Galicia e o Concello de Lugo na acusación popular permitiría a necesaria visión de conxunto, dada a complexidade e o número de pezas. Para persoarse poderían empregar medios propios, ou ben contratar asesores por concurso público, para evitar a saturación dos servizos xurídicos.