O que fose concelleiro de Tráfico entre 1999 e 2008 no Concello de Lugo, Francisco Fernández Liñares, aceptou un ano e catro meses de cárcere e unha multa de 6.000 euros por suborno e pertenza a grupo criminal, xunto con outros dous investigados –unha ordenanza municipal e o delegado da empresa Setex Aparki, concesionaria da ORA–. Tamén foi condenado o responsable de Vendex en Galicia.

O Xulgado de Instrución número 1 de Lugo remitiu á Audiencia Provincial a causa na que investigou a presunta adxudicación fraudulenta, en 2009, do contrato de xestión do servizo de regulación de aparcadoiros na vía pública (ORA) no Concello de Lugo.

Precisamente, no marco desta causa, o pasado mes de maio o que fose alcalde de Lugo, Xosé López Orozco, quedou liberado da investigación que se exercía contra el nesta mesma peza separada da macro operación denominada Pokémon, de forma que quedou liberado de todas as investigacións que se abriron contra el.

Por contra, esta condena de Liñares (que ten que ser ratificada) súmase xa a outra ao que tamén foi presidente da Confederación Hidrográfica Miño-Sil (CHMS). Así, a Sección Segunda da Audiencia de Lugo impúxolle cinco anos de prisión, xunto a nove empresarios –dos que oito foron condenados a un ano e tres meses de prisión– por comisións na concesión de obras do ente público.

Sobre o caso actual, o maxistrado do Xulgado de Instrución número 1 de Lugo emitiu o auto de apertura de xuízo oral despois de que as partes chegasen a un acordo coa Fiscalía, o cal deberá ser ratificado nunha comparecencia convocada pola Audiencia.

ACEPTACIÓN DA CONDENA

No auto, consta que o tres investigados aceptaron ser condenados por suborno e pertenza a grupo criminal. Desta forma, o concelleiro que exerceu entre 1999 e 2008 no Concello de Lugo e a ordenanza do Concello e delegado da empresa Setex Aparki conformáronse con ser condenados, como autores dun delito de suborno cometido por funcionario e dun delito de pertenza a grupo criminal, a un ano e catro meses de prisión, ao pago dunha multa de 6.000 euros e á inhabilitación para emprego ou cargo público durante dous anos.

Pola súa banda, o responsable de Vendex en Galicia aceptou, por incorrer nun delito de suborno cometido por particular e noutro de pertenza a grupo criminal, un ano e catro meses de cárcere e o pago dunha multa de 6.000 euros.

O xulgado acordou, á vista do informe do médico forense e a solicitude do fiscal, o sobresemento e arquivo das actuacións respecto ao presidente e fundador do grupo Vendex dada “a falta de imputabilidad criminal clara do investigado”.