A Xunta leva unha campaña escolar sobre seguridade viaria ao CEIP de Castroverde

Alumnado na clase | Xunta de Galicia

A Xunta levará este luns a campaña ‘O corazón está do teu lado’ ao CEIP de Castroverde (Lugo), despois de que outros colexios da provincia –CEIP Monterroso e CEIP Monte Baliño, este último en Pantón– xa formen parte desta iniciativa sobre seguridade viaria.

Segundo informa o Goberno galego, a rapazada de Primaria do CEIP de Castroverde contará a partir deste luns coas unidades didácticas coas que traballarán ao longo do curso para sensibilizarse sobre o respecto ás normas de circulación.

Esta iniciativa da Consellería de Infraestruturas e Mobilidade, en colaboración coa de Educación, levará a cabo este curso en 20 novos colexios de Galicia, dándolle así continuidade a esta actividade formativa, dirixida a rapazada de seis a doce anos, que vén desenvolvendo nos últimos anos. Entre o pasado curso e o presente, chegou a uns 40 centros.