A presidenta do PP de Lugo e alcaldesa de Mondoñedo, Elena Candia, animou ao presidente da Xunta e líder do PPdeG, Alberto Núñez Feijóo, a volver presentarse á reelección ao considerar que sería unha “boa noticia” para Galicia.
Elena Candia pronunciouse deste xeito en declaracións aos medios antes de participar no pleno da Deputación de Lugo e un ano antes de que teñan lugar as eleccións galegas, se non se produce adiante electoral.
“Se algo ten claro todo o Partido Popular de Galicia e, eu creo, de toda España, é que en Galicia temos o privilexio de ter un gran líder e un gran xestor“, manifestou.
Con todo, asegurou que respectará a decisión que tome o máximo mandatario autonómico. “Evidentemente, explicado así, parece que é unha obrigación, pero indubidablemente para todos os militantes, para os meus, polo menos persoalmente, e creo que para todos os que represento (máis de dez mil afiliados na provincia de Lugo) que Feijoo decidise que se volve a presentar sería unha boa noticia“, incidiu.