Francisco: “Fomos valentes sempre”

Francisco, nun partido no estadio Ángel Carro

Club Deportivo Lugo xogará mañá a última xornada de liga recibindo á U.D. Almería no estadio Ángel Carro a partir das 20:30 horas. Francisco Rodríguez, primeiro adestrador, compareceu en rolda de prensa.

O Almería precisa sumar para salvar a categoría. “Non creo que sexa o Club Deportivo Lugo ou Francisco o que mande ao Almería ao pazo. Mañá, ao acabar o partido, cada un estará onde debe estar”, respondeu.

Francisco destacou que “o equipo competeu en todos os partidos” cunha “imaxe boa”. Lembrou que “o respecto á competición é enorme”. “A tempada fíxosenos bastante longa. Somos realistas. Fai un mes que o equipo deixou de competir por eses seis primeiros postos cos que se soñou en decembro. Temos un debe coa nosa afección durante todo o ano. Queremos rematar cunha sensación boa, que vexan un equipo que compite e sacar eses 57 puntos”, resumiu. “Podémosnos mirar á faciana. Fomos valentes sempre, aínda que non cheguemos onde queriamos”, engadiu logo.

Declarou que acadar os 57 puntos, que sumará o equipo de gañar mañá superando o tope histórico do equipo en Segunda, sería “unha cifra importante” que queremos “todos”.

O adestrador albivermello explicou que o central José Carlos é baixa mañá por sanción, así como teñen diferentes molestias o central Luis Muñoz e os dianteiros “Chuli” e Mario Barco. Sobre Barco, opinou que é “difícil” que mañá poida xogar.

Roberto xogará mañá

Francisco confirmou que mañá “vai xogar Roberto” Fernández, porteiro do Lugo que anunciou a súa retirada este mediodía e que mañá vai competir no seu derradeiro partido coma profesional. “Merécese ese premio de xogar, divertirse, irse con boas sensacións e despedirse como se merece”, explicou. O adestrador andaluz acudiu á rolda de prensa na que Roberto anunciou a súa retirada. Roberto seguirá vencellado ao club na súa estrutura. “Quixemos estar con el”, subliñou. Calificou de “emotiva” a comparecencia de prensa do porteiro lucense.

Futuro

Francisco ten unha tempada máis de contrato, máis véncellano ao Granada C.F. como futuro adestrador. “Mañá remata a tempada e despois falaremos o presidente máis eu. Os dous sabemos o que queremos”, contestou. “Tomaremos esa decisión en breve”, comentou despois.

Foto de laliga.es

DEIXAR UN COMENTARIO

Please enter your comment!
Please enter your name here