Dúas persoas quedan atrapadas por unha enchenta en Guitiriz

O seu coche quedou bloqueado. Tamén un desprendemento de terra en Baralla obrigou a interromper o tráfico.

Coche atrapado nunha enchenta tras a crecida do caudal do río polas fortes choivas e as borrascas / Garda Civil

Dúas persoas quedaron atrapadas no interior do coche no que circulaban en Guitiriz ao terminar atrancado por mor da crecida dun río.

Este incidente tivo lugar sobre as 19,15 horas no lugar da Pobra de Parga, na estrada que une Parga e Mouriz. Tras ter constancia do ocorrido a través dun dos ocupantes do turismo, o CIAE 112 Galicia pasou o aviso aos Bombeiros de Vilalba, a Urxencias Sanitarias de Galicia-061 e á Garda Civil.

Segundo indicaron os membros do Servizo de Prevención, Extinción de Incendios e Salvamento de Vilalba ao 112 Galicia, as persoas que viaxaban no vehículo puideron saír e “atópanse en bo estado”. Por outra banda, retiraron o coche da zona afectada e a estrada quedou cortada.

DESPRENDEMENTO EN BARALLA

Ademais, un desprendemento de terra en Baralla obrigou a interromper o tráfico de vehículos na estrada LU-710, entre os puntos quilométricos 0 e 1,500. Foi unha persoa particular quen alertou do desprendemento ao 112 Galicia pasados uns minutos das 7,00 horas. Tras iso, solicitouse a intervención da Garda Civil de Tráfico e do servizo de mantemento da vía.

Así mesmo, por parte do 112 Galicia informouse os feitos aos Bombeiros de Sarria e ao GES de Becerreá.

DEIXAR UN COMENTARIO

Please enter your comment!
Please enter your name here