Despois de pedir o rexeitamento dos restos do ditador Franco, o cura de Momán (Xermade) volve dirixirse á curia para acusar de “terroristas” a quen abusa ou encobre os actos de abusos. Luís Ángel Rodríguez Patiño, que oficia asemade en Labrada (Guitiriz) e Xestoso (na provincia da Coruña), opina que a Igrexa española debería pedir perdón en vez de tentar esquecer o sufrimento causado ás familias.

O reivindicativo sacerdote lembra que empregou este termo por vez primeira en 2010, “cando saíron estes casos en España”. Argumenta que o cualificativo de terroristas é necesario para “aqueles que causan terror”. Así, os membros do clero que “causaron terror a nenos, a mozos e están a causar moito terror ás familias” merecen tal referencia.

Mais o cura de Momán especifica que o de terroristas vai tamén para os que encubren os abusos a menores no seo da institución, denunciando o corporativismo que impide investigacións e sancións acordes. “Primeiro os que cometen, e logo os bispos que calan, consenten e mesmo puxeron diñeiro para que as vítimas calasen a boca”, expuxo. “Son terroristas e están a violar o mandato de Cristo e do Evanxeo”.

Que a Igrexa pida desculpas

Para Rodríguez Patiño, os abusos perpetrados deberían obrigar á Igrexa española a pedir desculpas, en sintonía coa mensaxe do Papa Francisco. O cura de Momán explica que a curia hispana “se esconde como caracol na casca, tentando que se esqueza, e facendo moitísimo dano ás familias”. “Están a tapar, escondendo e gastando unha cantidade de millóns enormes en tribunais que non acaban nin coa dor, nin co sufrimento”.

Na loita contra a pederastia, o relixioso ilustra que “se o cesto está contaminado, por moita froita nova, o cesto” seguiría “podre”. Sobre o caso do frade do Cebreiro, procesado e acusado por supostos delitos da índole, critica que “aínda encima tapouse”. “Non lle vin un propósito de emenda de recoñecer as faltas, máis ben ao contrario”.