InicioTerra CháMurasMuras presume do seu mel de montaña

Muras presume do seu mel de montaña

O Concello de Muras organiza esta fin de semana, 19 e 20 de novembro, a súa VII edición da Feira do Mel de Montaña. Para coñecer máis detalles desa celebración falamos con Mario Rouco, concelleiro de Medio Rural.

PUBLICADA O

- Advertisement -

Mario Rouco cóntanos que leva sete anos no Concello de Muras, xusto os que leva organizándose esta mostra que exalta o excelente mel que se fai neste lugar. Dinos tamén que os obxectivos do evento eran, ademais de poñer en valor este produto diferenciado e de alta calidade, formar ao sector para que aqueles apicultores que o quixesen puidesen profesionalizarse e vivir exclusivamente do mel se así o desexaban.

Os obxectivos do evento eran, ademais de poñer en valor este produto diferenciado e de alta calidade, formar ao sector para que aqueles apicultores que o quixesen puidesen profesionalizarse

Na primeira edición eran uns 8 os produtores e na actualidade son arriba de trinta. Aínda que custa ver produtores que dan o paso á profesionalización “a xente nova empeza a velo”, di Mario engadindo que “dar o paso e chegar á etiquetaxe fai que o mel aumente de valor”.

Como comentamos, dende o concello buscan dende o principio incidir na formación e neste eido contan coa colaboración da asociación de apicultores ‘Casa do Mel de Goente’ das Pontes.

O MEL DE MONTAÑA DE MURAS

O mel das colmeas de Muras “é moi potente e enche o padal, deixa un sabor constante e ten unha cor escura moi característica que lle dá o breixo”, dinos Mario Rouco.

Sabemos que o máis apreciado e valorado no mercado é xustamente o monofloral de breixo, un arbusto que se dá por toda Galicia e que ten unhas pequenas e fermosas flores brancas ou malvas. Moi presente na Serra do Xistral, mais tamén se produce no concello a partir de castaño, silvas, eucalipto, etc.

O mel das colmeas de Muras “é moi potente e enche o padal, deixa un sabor constante e ten unha cor escura moi característica que lle dá o breixo”

A FEIRA DO MEL

A mostra faise dende a primeira edición na parroquia de Viveiró. “Antes facíanse todos os eventos na capitalidade de Muras pero a feira do mel decidímola facer en Viveiró porque é o segundo núcleo rural do concello, está a tan só 15 quilómetros e a nosa intención é tamén descentralizar as celebracións”, argumenta o concelleiro.

A Praza do Viveiró acollerá, pois, os días 19 e 20 de novembro a Feira do Mel na que haberá 7 vendedores de mel só de explotacións de Muras e outros postos, un total de 25, con produtos e material temático da feira e tamén produtos agroalimentarios da tempada.

A feira conta cun ‘Concurso de calidade do Mel’ ao que se presentan este ano 11 produtores locais que pasaron antes unhas analíticas que garanten unha calidade mínima. A cata será o sábado pola tarde no colexio do Viveiró, lugar onde 6 catadores, seguindo as pautas que marca a Casa do Mel de Goente, valorarán os meles presentados fixando especial atención nos principais parámetros de olor, color e sabor.

II Cata do Mel. Foto: Concello de Muras.

Dous serán os recoñecementos que se fagan: un ao ‘Mellor mel de montaña da feira’, e outro ao ‘Mellor mel monofloral’. A entrega dos premios deste concurso será o domingo 20 ás 17:30 h. na Praza do Viveiró.

Ademais da exposición e venda de mel e produtos derivados, así como outros agroalimentarios de tempada, a feira foi aumentando cos anos o número de actividades paralelas. Nesta edición, por exemplo, hai as seguintes:

Sábado 19

18:45 h. Relatorio de Jaume Cambra baixo o título “Control de Varroa en Apicultura Ecolóxica” no Colexio o Viveiró. Asistencia de balde ata completar aforo.

20:30 h. Degustación de balde de liscos e castañas na carpa do colexio de Viveiró.

21:00 h. Actuación musical do “Dúo Eclipse” tamén na carpa.

Domingo 20

10:30 h. Apertura de postos.

11:30-13:30 h. Obradoiros infantís na Praza do Viveiró.

12:30 h. Mostra de xantares e degustación a cargo da cociñeira Beatriz Sotelo na Praza do Viveiró.

14:00-16:00 h. Pausa xantar na carpa do Colexio.

16:30 h. Shwcooking de coctelería con mel a cargo de Diego Mosquera, na Praza do Viveiró. A esta hora tamén obradoiro infantil.

O Concello de Muras organiza a feira coa colaboración da Vicepresidencia da Deputación de Lugo e da Casa do Mel de Goente (As Pontes).

“Aqueles que veñan e vexan a Serra do Xistral van dicir que hai que volver. Muras unha vez na vida hai que visitala”, Mario Rouco

ACHEGARSE A MURAS

Mario Rouco lémbranos que o evento vai cada ano a máis, que a carpa que habilitan é cada ano máis grande, que haberá unha charanga animando e que é unha boa ocasión tamén para achegarse a coñecer o concello e a súa contorna.

Ademais de todos os atractivos comentados da feira, Mario teno claro para convencernos: “aqueles que veñan e vexan a Serra do Xistral van dicir que hai que volver. Muras unha vez na vida hai que visitala”, remata.

ÚLTIMAS

O Colexio de Arquitectos de Galicia presenta alegacións ao proxecto de Altri en Palas e pide máis información

O Colexio oficial de Arquitectos de Galicia (COAG) acordou presentar alegacións ao Estudo de...

O vello profesor Xesús Alonso Montero volta ao seu instituto de Lugo para unha gran homenaxe

O destacado escritor, lingüista, profesor e ex presidente da Real Academia Galega (RAG), Xesús...

O BNG urxe ao Ministerio de Transportes realizar actuacións na N-6 ao seu paso polos concellos lucenses

O deputado do BNG no Congreso, Néstor Rego, rexistrou varias iniciativas na cámara baixa...

Investigados dous lucenses tras atopar un can abandonado que fora dado de baixa por falecemento

A Garda Civil investiga a dous veciños das localidades lucenses de Castroverde e do Corgo como supostos autores...