Todos os grupos parlamentarios apoiaron a iniciativa do BNG para instar á Xunta a axilizar as obras e as actuacións para a reapertura total do centro de saúde de Parga, en Guitiriz.

Concretamente, a proposta insta o Goberno galego a “acometer cantas accións sexan precisas para a apertura, o máis axiña posible, do centro de saúde de Parga”, coas instalacións e persoal “adecuados” para atender, “coa máis alta calidade asistencial á poboación do ámbito de influencia dese consultorio”.

Precisamente, foron diferentes as mobilizacións protagonizadas polos veciños para pedir a reapertura deste consultorio. Neste sentido, o concelleiro do BNG Xosé Lois González Souto ‘Pereira’ lamentou a decisión de abrir coa “metade” do servizo.

“Ou se está cos veciños ou se está coas políticas de redución de servizos para beneficiar á sanidade privada. É preciso que se abra o consultorio con todas as coberturas”, reclamou o BNG.