A xuíza da praza número 2 Instrución do Tribunal de Instancia de Lugo decretou o ingreso en prisión provisional, comunicada e sen fianza por un delito de homicidio para o home acusado de apuñalar á súa nai durante un brote psicótico en Lugo no mes de maio, segundo confirmaron fontes do TSXG.
O home permanecía hospitalizado no Hospital Universitario Lucus Augusti desde o mes de maio. Cabe lembrar que a muller faleceu no HULA despois de resultar gravemente ferida ao ser apuñalada, presuntamente, polo seu fillo durante un brote psicótico cando ambos se atopaban sós en casa.
A muller foi ingresada na Unidade de Coidados Intensivos, onde chegou con vida pero en estado grave tras os feitos, que tiveron lugar nunha vivenda situada na Praza de Bretaña, onde o home convivía cos seus pais. Segundo as investigacións, o agresor atacaría á súa nai cunha arma branca no interior do domicilio e logo sairía de casa.
Foi o pai do presunto autor quen, ao regresar ao domicilio e atopar á súa esposa ferida, avisou aos servizos de emerxencia, que se desprazaron ao lugar. A dotación contou con varias patrullas da Policía Nacional e da Policía Local de Lugo.
A muller foi trasladada de urxencia ao HULA en estado crítico, aínda que finalmente non puido superar a gravidade das lesións e faleceu de madrugada.
