A Policía Local de Lugo informou de que un home sufriu na madrugada do 7 de outubro unha “brutal” agresión con roubo na vía públia. En total, subtraéronse 1.000 euros en efectivo –200 do peto traseiro e unha riñonera con outros 800– e 220 euros máis en Lotaría de Nadal, ademais de documentación persoal e as chaves do seu posto de traballo.
Segundo informa nun comunicado, os axentes interviñeron tras recibir aviso sobre a presenza dunha persoa ferida na confluencia da Avenida de Magoi coa Rúa Madanela. No lugar localizouse a un home con evidentes lesións faciais e sangrado abundante, quen manifestou ser abordado por varios individuos que o derrubaron e lle propinaron fortes patadas na cabeza, antes de roubarlle.
A vítima, segundo relata a Policía Local, relacionou o asalto cunha discusión previa ocorrida nun establecemento de hostalaría no que coincidira cun home acompañado dunha parella, quen podería observar onde gardaba o diñeiro ao usar unha máquina comecartos. A Policía Local trasladou que se obtiveron gravacións do local que permitirán avanzar na identificación dos autores. A vítima foi evacuada ao Hospital Universitario Lucus Augusti (HULA) dada a gravidade das lesións.
