Lugo Monumental decidiu suspender a distribución da Credencial de Lugo do Camiño de Santiago porque, segundo asegura nun comunicado, negouse a Compostela a peregrinos que portaban este documento para acreditar parte da ruta realizada. A Credencial de Lugo, editada pola entidade co aval do Bispado de Lugo e que serve aos peregrinos para recoller os selos das localidades que atravesan, levaba funcionando con normalidade desde o ano 2016. Esta era aceptada para obter a Compostela, pero “nos últimos tempos”, sinala Lugo Monumental, negouse ese documento aos peregrinos que portaban a Credencial de Lugo.

A asociación achaca a que esta suposta diferenza de criterios débese a un “interese puramente económico” por parte de responsables da Catedral de Santiago: “Para lograr maiores ingresos, está disposta a pór en dúbida a autoridade do Bispo de Lugo”. Así, traslada que manterá esta medida ata que “a Igrexa resolva os problemas”. “Sorprendentemente outras credenciais si son aceptadas, e mesmo se pode obter a Compostela presentando un folio en branco cos selos que demostran facer o Camiño, o que demostra unha inexplicable animadversión contra a Credencial de Lugo”, expón o comunicado.

NEGACIÓN DA CREDENCIAL

Tal e como recolle Lugo Monumental, semanas atrás un dos establecementos distribuidores recibiu unha chamada dunha persoa que aseguraba ser representante da Oficina do Peregrino en que se lle dicía que a Credencial non tiña validez. A entidade interpretou que esa persoa “non estaba ben informada”, xa que o documento usouse durante anos sen a menor oposición por parte de Santiago. A asociación púxose en comunicación de inmediato co Bispado de Lugo, quen se limitou, segundo expón, a responder que están “a solicitar datos” e que traballan no tema.

“Comprendemos que é un asunto interno que debe resolverse polas canles da Igrexa católica, pero a asociación non pode esperar durante máis tempo a tomar decisións, xa que os peregrinos están a ser as vítimas desta absurda situación”, acusa a entidade. O xoves recibiu un correo dun peregrino que presentou a Credencial de Lugo e ao que lle negaron ao Compostela, o que Lugo Monumental cualifica como “sorprendente”. Con todo, o correo puido “arroxar luz”, a ollos da entidade, xa que aos peregrinos aos que se negou a Compostela ofrecéuselles o documento se compraban a Credencial emitida en Santiago, polo que considera “fácil deducir” que se trata de “unha pura cuestión económica”.

Agora, a asociación, ademais de suspender a distribución da Credencial, remitirá escritos ao Bispado de Lugo, o Arcebispado de Santiago, a Conferencia Episcopal Española e ao Papa León XIV explicando a situación. Ademais, comunicará o sucedido ás administracións públicas implicadas no Camiño de Santiago –principalmente a Xunta de Galicia, indica– para que interveñan e porase en contacto con outras persoas que solicitaron información da Credencial para detectar máis casos de rexeitamento.